Пристигнаа четири од петте нови возила од типот „шкода“ што Општина Битола ги набави преку оперативен лизинг. За нив таа во следните четири години ќе плати 9.900.000 денари (oколу 160.000 евра) или околу 3.000 евра месечно, а потоа ќе им ги врати на компанијата „Порше лизинг ДООЕЛ Скопје“.
„Месечно од буџетот кој се собира од давачките на граѓаните, Општината за петте возила ќе плаќа околу 3.000 евра. Дали ако некој од општинарите си набавуваше возило за дома, ќе го земеше на лизинг, 48 месеци да плаќа наемнина и на крај пак да нема што да вози. Ова се пари фрлени во бунар“, вели битолчанец кој случајот го пријави преку алатката Пријави корупција на САКАМДАКАЖАМ.МК.
Претседателката на Советот, Габриела Илиевска од независната советничка група Поинаку, вели дека со гласањето на буџетот се изгласала и ставка за купување возила и никој не вели дека не треба да се купат, но во случајот проблематично е тоа што нема купување туку изнајмување возила преку оперативен лизинг кои по четири години Општината ќе ги врати назад.
Советникот од СДСМ Петар Николовски вели додека градоначалникот располага со ново хибридно возило, набавено пред неколку години, а сепак се одлучува за ново луксузно дизел возило.
„Во контекст на потребите на граѓаните, ваквите инвестиции во луксузни возила се несоодветни, особено кога јавниот превоз и инфраструктурата во градот се во незадоволителна состојба“, вели Николовски.
Ексградоначалничката Наташа Петровска во ваквата постапка гледа злоупотреба на службената должност и неодговорност.
„На Општината ѝ требаа две возила од средна класа и да ги купи во своја сопственост. Сѐ друго е нерационалност, ненаменско трошење и мириса на коруптивност“, вели Петровска.
Од Општина Битола велат дека ги разгледале искуствата на другите институции кои имаат набавено возила по пат на оперативен лизинг, како Владата, Државна комисија за жалби по јавни набавки, Служба за општи и заеднички работи, Државна видеолотарија, што за нив говори за економска исплатливост. (Фото: СДК.МК)
Според договорот до кој дојде САКАМДАКАЖАМ.МК склучен со операторот „Порше лизинг ДООЕЛ Скопје“, Општината набавува „шкода суперб Б9 селекшн“ (лимузина, најнов модел промовиран годинава во Македонија) за која месечно четири години ќе плаќа по 974,69 евра, па патничко возило од најновиот модел на „шкода октавија Фи селекшн“ за која месечната рата ќе биде 656,35 евра и три помали возила „шкода фабија есенс“ по 402,27 евра или заедно 1.206, 81 евро без ДДВ. Вкупно за петте возила месечно ќе се плаќа лизинг од 2.837,85 евра или безмалку 3.000 евра. Наплатата ќе оди на фактура секој месец. Ако не се платат три месеци, операторот има право да си го земе возилото.
Денеска гаражите во општинскиот двор беа ширум отворени. Таму не беа новите возила, но имаше мајстори кои вршеа поправки.
Од Општината ни ги потврдија типовите на возила и посочените износи. Велат дека на 27 ноември пристигнале четири од возилагта, а петтото ќе им биде испорачано во следните 60 дена. Потребни им се возила зашто возниот парк им е застарен, а поголем дел од возилата се веќе расходовани (со поминати над 500.000 километри). Во изминатите 4 години се соочиле со голем број проблеми, чести поправки, сервисирања, зголемени трошоци, а многу често и покрај навремената интервенција, се случувало возилата да бидат вратени во Битола со шлеп служба. Ова ја отежнува работата на општинската администрација, а загрозена е и безбедноста на вработените.
На нашето прашање дали зделка е економски оправдана, од локалната власт велат дека ги разгледале искуствата на другите институции кои имаат набавено возила по пат на оперативен лизинг, како Владата, Државна комисија за жалби по јавни набавки, Служба за општи и заеднички работи, Државна видеолотарија, што за нив говори за економска исплатливост.
На товар на операторот паѓаат обезбедувањето сет гуми, нивна замена, редовен сервис и одржување на возилото во постојана возна состојба, регистрација, технички преглед, каско осигурување, авто одговорност, осигурување на трети лица, зелен картон и друго.
„Согласно претходно наведеното, констатирано е дека ваквиот начин на набавка на возила ќе овозможи набавка на доволен број на возила согласно потребите на Општината, а од друга страна, истите на трошок на економскиот оператор ќе може да се сервисираат и одржуваат. Ова ја потврдува финансиската, но и оперативната исплатливост, во споредба со набавка на возило во трајна сопственост или со финансиски лизинг“, велат од Општината.
Државната комисија за спречување на корупцијата (ДКСК) пред две години утврди слабости во спроведувањето на постапките за набавка на влозила преку лизинг кај претходната Влада.
Ж. ЗДРАВКОВСКА
