Февруари е месец на орално здравје кај децата, а улогата на млечните заби е незаменлива. Ова e мотото на овој месец, со кој кај родителите се подига свеста за потребата од рано одење на стоматолог заради забоздравствена заштита. Стоматологот д-р Анита Солева од Здравствен дом Велес, вели дека децата треба да почнат да одат на стоматолог уште со излегувањето на првите млечни заби.

„Улогата на млечните заби е голема, имаат иста улога како и постојаните. Имаат улога за џвакањето на храната, за говорот, за убавиот изглед на лицето. Затоа е потребно да се одржуваат здрави сѐ до нивната физиолошка смена. Многу е важна раната превентива на млечните заби кај децата. Со појавата на првото млечно запче, родителите треба да водат грижа за одржување на здрави млечни заби кај децата“, вели д-р Солева, стоматолог во Службата за превентивни стоматолошки услуги кај децата од предшколска возаст.

Д-р Солева вела дека забите имаат многу важна улога за говорењето кај децата, бидејќи со движењето на усните, јазикот, образите, одреден дел од забите се допират со овие нив, па така правилно се изговараат буквите и зборовите, што влијае на правилното говорење. Тоа овозможува правилно да се формираат вилиците, да се воспостави нивен правилен однос и правилно формирање на лицето.

Во оваа амбуланта децата доаѓаат од пет години, со систематските прегледи и контрола, потребни како задолжителни за упис во прво одделение. Но, децата треба да одат на стоматолог уште од најрана возраст.

„Контролата на забите на децата е потребна уште со нивното прво појавување. Првиот стоматолошки преглед се препорачува на една година. Тогаш родителите треба да одберат матичен стоматолог на детето и да вршат редовни контроли, двапати во годината. Ако детето е склоно на расипување на забите, таа контрола треба да биде почеста. Потребно е рано да се почне со рутина на четкање на забите, прво како забава и игра, а потоа и секојдневна обврска. Има плашливи деца и токму поради тоа треба рано да се запознаат со стоматолoгот, со стоматолошката амбуланта. Да дојдат кога имаат здрави заби, за потоа да бидат опуштени и немаат страв. Многу е тешко да се работи со детето кога тоа има болка, кога е измачено, ненаспано и тоа и родителите. Болката што ја предизвикува забот е многу поголема, од тоа што се работи при негова санација“ , вели д-р Солева.

П. ПЕЧКОВ