Советот на Општина Велес одлучи времено да се дадат на користење три простории од поранешното основно училиште „Јордан Хаџи Константинов-Џинот“, за да може Работничкиот универзитет „Благој Страчковски“ непречено да ги продолжи неговите тековни активности. Зградата на Работничкиот универзитет се сруши, откако градежникот на куќа во соседството започна да ја руши, а немал одобрение. Објектот е изграден 1920 година и е државна сопственост.

Точката беше ставена како итна на последната 18. седница, по барање на градоначалникот Марко Колев и беше едногласно усвоена. Советникот Коста Нојков имаше забелешка во дел на плаќање на наемнината.

„Добро е што ќе дадеме простории каде Работничкиот универзитет ќе може да продолжи со неговите работни активности. Но сметам дека во одлуката треба да се вметне и член со која инвеститорот на куќата, која при рушењето го сруши и дел до Работничкиот ќе биде задолжен да плаќа месечна наемнина. Тоа е негова обврска најмалку за тоа што го стори со зградата“, рече Нојков, но забелешката не беше усвоена.

П. ПЕЧКОВ