РИБИ И ШКОЛКИ УМИРААТ НА СУВО БОРЕЈЌИ СЕ ЗА ВОДА – ИСТРАЖУВАЊЕ НА НУРКАЧИТЕ ОД „ВРЕЛО“ ВО ПЕШТЕРАТА ЗАВИР ВО ПРЕСПА

    РИБИ И ШКОЛКИ УМИРААТ НА СУВО БОРЕЈЌИ СЕ ЗА ВОДА – ИСТРАЖУВАЊЕ НА НУРКАЧИТЕ ОД „ВРЕЛО“ ВО ПЕШТЕРАТА ЗАВИР ВО ПРЕСПАЖивиот свет е загрозен бидејќи нивото на Преспанското Езеро е многу опаднато. (Фото: СДК.МК)

    Заробени риби во мало езерце кое настанало при проток од Преспанското во Охридското Езеро преку понори кај пештерата во Завир во Горица, Албанија и рид прекриен со изумрени школи и полжави, со лопата да ги ринеш. Ваква слика затекнаа нуркачите од спелеонуркачкиот клуб „Врело“ при нивната експедиција за мапирање на пештерата Завир која се посочува како најризична точка за истекување на езерото.

    „Имаше и изумрени школи со лопата да црпиш, се повлекле постепено кон водата ама изумреле поради недостиг на храна, претпоставувам“, вели нуркачот Александар Ацев. (Фото: СДК.МК)

    „Живиот свет е дефинитивно загрозен бидејќи нивото на езерото е многу опаднато, а исто така и нивото на кислород во водата зашто нема прилив на свежа вода, атмосферска вода, или од реки, извори… При протокот имаше мало езерце со мали рипчиња кои беа заробени што се гледа од видеото направено таму, како се трудат да испливаат кон поголемото езеро каде има посвежа вода. Имаше и изумрени школи со лопата да црпиш, се повлекле постепено кон водата ама изумреле поради недостиг на храна, претпоставувам“, вели нуркачот Александар Ацев од „Врело“

    Заедно со колегите од клубот „Врело“ Слободан Рајковски и Стефан Петровски ја истражуваа месноста Завир. На терен забележаа поток долг околу 200 метри од кој се оформува мало езерце од кое потоа водата понира преку Галичица кон Охрид.

    „Местото Завир е всушност еден поголем регион каде понира Преспанско Езеро и не е само една пештера туку е цела област. Таму најдовме повеќе понори, два се активни, а има и некои кои се веќе пресушени и не се активни. Ако направиме понатамошна експедиција ќе можеме да провериме дали понорите понатаму некаде се шират. Земајќи предвид дека има варовнички капри водата си го нашла патот под земјата. Како што е веќе докажано со обојување на водата таа за неколку часа ќе стигне до изворите на југоисточниот дел од Охридското Езеро“, вели Ацев.

    Во моментот во пештерата Завид нема вода, сува е и затоа нуркачите го искористија моментот да видат што се случува во неа. Претходно била истражувана пред осум години. Освен Завир, постојат и други понори преку кои истекува Езерото, но треба да се истражуваат.

    „Ова е почеток на истражувањето. Понатму треба да се лоцираат понорите кои се под вода. Потребата за понатамошно испитување е огромна и има за цел да се предвиди кога настануваат овие циклуси на повлекување на езерото. Со тоа ќе може да се одржува биолошкиот минимум и живиот свет во него“, велат нуркачите од „Врело“.

    Нивото на езерото е незапаметено досега опаднато, а сето тоа го загрозува и живиот свет во водата. (Фото: СДК.МК)

    На Преспанското Езеро последниве години му се случува катастрофа. Нивото на езерото е незапаметено досега опаднато, а сето тоа го загрозува и живиот свет во водата. Државата веќе изработи извештај и анализа на состојбата со езерото и донесе Акциски план со мерки. Во следниот период меѓу другото, ќе се врши и анализа на дното од езерото, како и анализа и мапирање на езерото кое настанало во пазувите на Галичица со понирањето на водата.

    Ж. ЗДРАВКОВСКА

     

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира