Општина Штип денеска до Министерствата за култура и за локалната самоуправа достави проект за реставрација на Тврдината Исар со кој аплицира за средства по вториот повик на Владата за капитални инвестиции со пари од кредитот од Унгарија. Градоначалникот на Штип Иван Јорданов кажа дека проектот е на Националната установа (НУ) Завод за заштита на спомениците на културата и Музеј Штип и предвидува комплетна реставрација и реконструкција на сите постојни кули и ѕидини за што, според проектот, ќе бидат потребни над 1,6 милиони евра.

Се предвидува комплетна реставрација и реконструкција на сите постојни кули и ѕидини. (Фото: СДК.МК)

„Штипјани секогаш се прашувале како некогаш изгледал овој симбол на градот, па со овој проект на Тврдината Исар се предвидува враќање на автентичниот изглед. На самиот врв на тврдината ќе се реставрираат трите кули кои меѓу себе ќе бидат поврзани со ѕидини кои ќе бидат високи и до 4 метри. Целиот простор ќе биде осветлен, а ќе се изградат дополнителни пристапни скалила до акрополот и останатите придружни објекти на самиот врв на тврдината од каде се пружа прекрасна панорама на Штип и неговата поширока околина“, вели Јорданов.

Градначалникот очекува по завршувањето на тендерската постапка да се оствари предвидената динамика на реализација на проектот и поголем дел од работите да завршат до крајот на оваа година.

Сега до средината на тврдината каде е Споменикот на револуцијата води асфалтен пат, а до врвот на Исарот пред неколку децении беа изградени над 250 скалила. Штипјани традиционално секоја година масовно се искачуваат на врвот на Исарот за денот на пролетта па на 22 март, кога се изведува народниот обичај Четр’се, прогласен за нематеријално културно наследство од УНЕСКО во 2013.

Т. ЈОВАНОВСКИ