Транспарент со натпис „Широк Сокак умира“ денес е поставен над едно од кафулињата што се затвори на Широк Сокак. Некој се инспирирал да го постави транспарентот откако минатата недела на една од најпознатите улици во земјава каде ритуал е пиењето кафе, во ист ден се затворија три кафулиња. Затворањето на кафулињата некои од газдите ги лоцираат во големите кирии на дуќаните, намалениот број гости и слабата економска моќ на граѓаните.

Кираџии на Широк Сокак велат дека градот е погоден од голем иселенички бран, прометот е намален, се затвораат дуќани, а ваквиот тренд не ги намалува високите цени на дуќаните што се издаваат под кирија. Нема месечна наемнина за дуќан под 2.000 евра, а највисоката се движи до 5.000 евра, како да се работи за локали на познатите улици во Минхен или на париската Шанзелизе. Месечниот закуп за дуќаните кои се плаќаат во странска валута е 11 пати повисока од просечната и 26 пати од најниската плата во земјава.

Додека дел од кафулињата со празни маси чекаат муштерии, уличните кучиња на сепарињата наоѓаат засолниште од дождот.

Ж. ЗДРАВКОВСКА