Во државните фирми висок е бројот на крводарители, додека во приватните е слаб и затоа треба да се работи на подигање на свеста за општествена одговорност, оти потребата за крвни единици е за сите. За ова се разговараше на Форумот за крводарителство „Нови концепти за мотивирање при доброволното крводарување“, одржан во Велес.

„Се разгледуваа актуелната состојба со крводарителството во државата, покриеноста со крвни единици, а посебно беше потенцирано повеќе да се вклучи приватниот сектор и да се истакне општествената одговорност на компаниите. Се донесоа заклучоци кои треба да служат за зголемување на мотивираноста за доброволно крводарување“, кажа Орце Николов, секретар на ОО на Црвен крст Велес.

Учесници на Форумот беа крводарители, раководството и вработени во Црвен крст, претставници на Министерството за здравство и на Институтот за трансфузиона медицина и мотиватори од локалните средини. Форумот беше организиран по повод 14 јуни, Светскиот ден за крводарителството.

Минатата година, во Македонија биле собрани 8,5% крвни единици повеќе од планираното, односно 59.688 единици крв.

П. ПЕЧКОВ