Патот од црквата Свети Пантелејмон со Средно Водно за автомобили не е прооден поради снегот. Утрово, како што објави Општина Карпош, повеќе возила не можеле да го продолжат патот кон средно Водно и останале заглавени во снегот.
„Општина Карпош им соопштува на своите граѓани дека патот меѓу Пантелејмон и Средно Водно во моментов не е безбеден за движење со моторно возило и апелира истиот да не се користи поради голомразица. Утрово на овој потег беа регистрирани повеќе возила заглавени во снегот“, велат од Општината.
„Надлежен за одржување на овој пат е ЈП ‘Македонија пат’, но за жал до сега по трасата ниту е фрлено сол, ниту е поминато со било какво возило за расчистување на снегот“, додаваат од Општина Карпош.
Патот во моментот е безбеден само за пешачење. Патеката изминативе денови беше раздвижена од пешаци, а децата се санкаа од угорницата до комплексот Македонско село. Повеќето автомобилите ги паркираат на паркинзите кај црквата и одат пеш накај Средно Водно.
