Во денешната акција на пошумување на опожарениот дел од езеро Младост, беа засадени сите 12 илјади набавени садници багрем. Во акцијата според организаторот Општина Велес, учествувале околу 200 лица, од невладини -граѓански здруженија, вработени во локалната власт, музејот, библиотеката, училиштата, ЈКП Дервен, но и од армијата, пожарникарите.

„Ме радува што во акцијата учествуваа пратениците од Велес, од власта и од опозицијата, претставници од двете партии. Ова покажува дека велешани знаат да бидат сплотени за доброто на градот. Ништо не е поважно од здравјето на граѓаните“, кажа градоначалникот Коцевски.

Садниците багрем беа засадени на површина од 10 хектари. Површните беа подготвени од страна на вработени на ЈП Македонски шуми ПЕ „Бабуна “ Велес. Ова е втора акција на пошумување на просторот околу езеро Младост, кој изгоре во пожар август минатата година. При минатогодишната акција, исто во декември, беа засадени 13 700 садници и безмалку сите биле зафатени. Општина Велес има отворено и наменска сметка, за набавка на садници за пошумување, на која досега се собрани вкупно 192.400 денари.

П. ПЕЧКОВ