Një nxënës nga shkolla fillore komunale “Sveti Kliment Ohridski” në Miravcë u diskriminua nga mësuesja, drejtoresha dhe pedagogu për shkak të modelit të flokëve të tij, të cilin ata nuk e pëlqenin. Fëmija, duke qarë, vetë i preu flokët me gërshërë si akt rebelimi dhe shkoi në shkollë në atë gjendje.

Në shtator, nëna e tij denoncoi këtë trajtim në Komisionin për Parandalimin dhe Mbrojtjen nga Diskriminimi, i cili së fundmi konstatoi diskriminim direkt ndaj nxënësit bazuar në gjini në fushën e arsimit. Në fillim të shtatorit, shkolla i kërkoi nënës që djali të kishte flokë të “rregullta”, edhe pse flokët nuk ishin të gjata. Ajo e dërgoi djalin në shkollë me flokë të kapura pas, por drejtoresha kërkoi që bishti të hiqej dhe njoftoi që fëmija të vinte me një model flokësh të pranueshëm.

Nxënësi, pasi dëgjoi një telefonatë të mësueses me nënën, vetë i preu flokët para syve duke qarë. Kur nëna kërkoi një takim me drejtoreshën për të sqaruar pse djali i saj konsiderohej i parregullt, ajo iu përgjigj se shkolla ka kod veshjeje, por nuk dha rregull të shkruar për flokët. Nëna vuri në dukje se një punonjës dhe një nxënëse kishin të njëjtën model flokësh pa pasoja, por pedagogu e kërcënoi se djali mund të përjashtohej.

Pas ankesës, në nëntor, shkolla hoqi pikën për modelin e flokëve nga rregullorja. Komisioni i dha shkollës rekomandime që të rishikojë rregulloret për të promovuar barazinë gjinore, përndryshe do të përballet me gjykatën. Rasti u paraqit edhe tek Avokati i Popullit.