Во Инспекторатот за употреба на македонскиот стандарден јазик ќе се вработат 12 инспектори, вели министерот за култура и туризам Зоран Љутков. После цела година откако беше изгласан Законот за употреба на македонскиот јазик, Владата во април ја назначи Менче Андреева за директорка на Инспекторатот.
Со овој закон, меѓудругото, пропишано е задолжително лекторирање на сите материјали со објавување на лекторот и задолжително вработување лектори во органите на законодавната, судската и извршната власт, во сите јавни установи и институции, во медиумите и конзулатите, тука спаѓаат и правните лица и меѓународните организации.
„Административните процедури кои се однесуваат на Инспекторатот за употребата на македонскиот стандарден јазик се завршени. Според донесената Измена на План за систематизација, Инспекторатот предвидува повеќе работни места. Колку ќе бидат првично вработени зависи од измената на Планот за вработување на Министерството за култура и туризам, која треба да биде одобрена од Министерството за финансии“, ни изјави Андреева.
Љутков на брифинг со новинарите на 30 јули рече дека по усогласување на актите за внатрешна организација и систематизација на Министерството за култура и туризам, инспекторатот започна со работа како орган во состав на Министерството и тоа со донесување на Правилник за изменување и дополнување на Правилникот за систематизација на работните места во Министерството за култура и туризам од страна на Министерството за јавна администрација.
„Изготвен е и Правилник за измена и дополна на Правилникот за внатрешна организација и работа на Министерството за култура и туризам и доставен до Министерството за финансии во кој се испланирани работни места клучни за отпочнување со работа на Инспекторатот за употребата на македонскиот стандарден јазик. Кога ќе се доби согласност веднаш ќе се пристапи кон вработување на инспектори. Планот е наскоро да биде објавен оглас за 12 вработувања“, рече Љутков.
Инспекторатот за употребата на македонскиот стандарден јазик ќе врши надзор над примената на Законот за употреба на македонскиот јазик и на прописите донесени врз основа на овој закон. Собранието го изгласа Законот на 26 јануари 2024, една година после првата јавна расправа. Предлогот-законот го подготвија тогашниот состав на Советот за македонски јазик и Министерството за култура, кога министерка беше Бисера Костадиновска-Стојчевска.
- ВЛАДАТА ЈА НАЗНАЧИ МЕНЧЕ АНДРЕЕВА ЗА ДИРЕКТОРКА НА ПРВИОТ ИНСПЕКТОРАТ ЗА УПОТРЕБА НА МАКЕДОНСКИОТ ЈАЗИК
- ЦЕЛА ГОДИНА НЕ СЕ ПРИМЕНУВА НОВИОТ ЗАКОН ЗА МАКЕДОНСКИ ЈАЗИК ОТИ НЕ Е ФОРМИРАН ИНСПЕКТОРАТ
- СОБРАНИЕТО ГО ИЗГЛАСА НОВИОТ ЗАКОН ЗА МАКЕДОНСКИ ЈАЗИК, ЕДНА ГОДИНА ПОСЛЕ ПРВАТА ЈАВНА РАСПРАВА
Б. НЕСТОРОСКА
