„Балада за лонецот и капакот“, третиот филм на Вардан Тозија, е единствениот долгометражен проект подржан на Конкурсот во прв рок на Агенцијата за филм. Филмот на Тозија, во продукција на „Минимал колектив ДООЕЛ Скопје“ доби 19.000.000 (околу 307,500 евра). Тозија е автор на наградуваните „М“, што имаше премиера во 2023, и „Џган“ во 2016.

Како што објави Агенцијата, од вкупниот буџет од 35,7 милиони денари (околу 578.000 евра), освен единствениот долгометражен филм, поддржани се и вкупно 14 кусометражни филмови и два анимирани. Поддршка добија 8 краткометражни играни филмови со македонски мнозински удел, 5 краткометражни документарни филмови со македонски мнозински удел и 1 кус игран филм со малцински македонски удел.

Од Агенцијата велат дека согласно ребалансот на Буџетот, на Конкурсот во вториот рок ќе бидат распределени значително повеќе средства. На 4 јули, министерот за култура Зоран Љутков изјави дека со ребалансот на Буџетот е предвидено Агенцијата за филм да добие дополнителни 145 милиони денари (2,3 милиони евра). Исто така, со измената на Законот за игри на среќа, кој е во владина процедура, Агенцијата за филм ќе добива 3% од уплатените давачки за игри на среќа.