По повод 40-годишнината од првото емитување на култната детска серија „Бушава азбука“, денеска во скопската населба Дебар Маало беше откриен мурал посветен на серијата. Со овој настан официјално започна одбележувањето на јубилејот, кое ќе вклучува и нови содржини наменети за најмладата публика.
Режисерот на серијата, Слободан Унковски, изјави дека „Бушава азбука“ е повеќе од емисија и претставува културно наследство кое може постојано да се обновува.
„Луѓето го паметат, генерацијата што како деца ја гледаше серијата, сега порасна, станаа родители и гледаат можности во тоа да ги образуваат или забавуваат своите деца. Јас со ‘Бушава азбука’ остарев 40 години, тоа е сериозна старост за нешто на телевизија и не е така свежа и модерна како што беше кога се појави“, рече Унковски.
Серијата од 1985, во продукција на Македонската радио телевизија (МРТ), беше насочена кон детското образование и запознавање со македонската книжевност, култура и традиција преку музика, цртан филм и актерска игра. Имаше вкупно 31 епизода, со просечно траење од 29 минути, секоја посебно посветена на буквите од македонската азбука. Таа е убедливо најуспешниот производ на МРТ, со кој многу генерации ја научија азбуката.
На настанот премиерно беше прикажана и најавната шпица за новата анимирана серија „Буквождер“, која е замислена како анимирано продолжение на оригиналната серија. Според Унковски, новата серија претставува „преминување на мост“ меѓу минатото и иднината, нудејќи поинаков аспект на буквите и употребата на јазикот.
„Се радувам што се појавува. Меѓутоа, мислам дека вистинското продолжение на ‘Бушава азбука’ ќе биде кога ќе се направи ‘Бушав буквар’, вториот дел, што е веќе напишан од Горан Стефановски и од Маријан Алчевски. Очекувам еден ден да се развие свест дека тоа е неопходно за да си го сочуваме и унапредиме јазикот“, додаде режисерот.
Организаторите на прославата велат дека целта е да се потсети на важноста од негувањето, чувањето и унапредувањето на мајчиниот јазик, како и на потребата од создавање квалитетна образовно-забавна програма за новите генерации.
