Со комедијата „100 работи“ во режија на Флориан Давид Фиц, вечерва во 19 часот во киното Милениум, ќе почне 14. Фестивал на Новиот германски филм. Од утре до 6 мај фестивалот ќе продолжи во киното Фросина, потоа ќе патува во киносалите низ земјата: Кавадарци, Куманово, Гевгелија, Прилеп, Охрид, Радовиш, Штип, Тетово и Битола.
На фестивалот ќе се прикажат драма, трагикомедија и комедија, семеен, детски и документарен филм, серија кратки филмови, меѓу кои: „Жешко столче”, „Надвор од системот”, „Во време кога светлината згаснува”, „Исход на вистината”, „Стикс”, „Среќата е за слабаци”, „Љубопитниот Тоби и тајната на нашата планета”, „Тим Талер или момчето што ја продаде својата насмевка” и „Помош ги смалив родителите”.
„Фестивалот редовно селектира филмови кои отвораат општествени размислувања и теми, не́ ангажира, а со тоа почнува и да нè менува. Филмовите се грижливо избрани со цел да задоволат многу вкусови, а некои од нив се навистина ексклузивни со постигнат огромен успех на филмските фестивали, а еден од нив беше и во конкуренција за наградата Златна мечка на престижниот Берлинале“, најавува амбасадата на Германија.
Гости на фестивалот ќе бидат директорот на Берлинскиот фестивал за кратки филмови Интерфилм, Хајнц Херманс и и филмската монтажерка од Берлин, Алета вон Фитингхоф. Тие ќе се сретнат со сите заинтересирани филмски работници во земјата, а ќе одржат и работилници со студентите по филмска уметност.
Б. НЕСТОРОСКА
