Лагата како феномен не само во меѓучовечките и брачните односи, туку и лагата во сите сфери на општественото живеење е темата на новата претстава „Лагата“ во режија на Бесфорт Идризи во Македонскиот народен театар (МНТ).

Премиератa, според текстот на современиот француски драматург Флоријан Зелер, е утревечер (15 октомври), а играат Јордан Симонов, Габриела Петрушевска, Оливер Митковски и Драгана Левенска.

Според режисерот, „Лагата“ е текст што говори за тоа колку можеме да бидеме искрени особено во интимните односи, односно кога, колку и дали воопшто е дозволено да се лаже.

Во комедијата, која во Македонија се поставува за првпат, Јордан Симонов го игра Павле, Габриела Петрушевска  е Родна, Оливер Митковски  е Михаил и Драгана Левенска е Јована.

„Проблемот во оваа држава е што дното или не постои или е многу длабоко. Ние 30 години сме во зона на слободен пад“, вели Митковски. (Фото: К. Попов)

„Во овој текст, акцентот не е на различноста на карактерите, туку на лагата во сите сфери на општественото живеење. Потрагата по вистината и лагата, и колку генерално сите луѓе се во потрага по вистината и што со неа откако ќе ја добијат. Не ја барајте вистината ако не можете да се справите со неа“, вели Митковски.

Според Левенска, текстот е за лагата во брачните односи , но генерално и лагата во целото секојдневие во кое живееме, за лажни пријателства, лажни медиуми, лажни врски, политики.

„Тоа се случува кога постои простор во една брачна врска, кога постои недоволен разговор, не се слушаат брачните партнери, па некаде љубовта згаснува и тогаш имаме потреба за онаа заљубеност. Љубовта и заљубеноста се две многу различни страни, и Јована паѓа под такво искушение да се гледа со другарот на сопругот, кој е и сопруг на нејзината најдобра пријателка“, додава актерката.

„Ние сме луѓе кои постојано бараме аргументи за нештата, оправданија, нема оправдување ако љубовта згаснала“, вели Левенска. (Фото: К. Попов)

Говорејќи за тоа колку овој текст ја кажува непријатната вистина за бракот, Митковски вели дека тој не е најсоодветен да говори на оваа тема, бидејќи не верува во бракот како институција, не говори за полигамност, туку дека смета сета бирократија околу бракот создава некаков притисок, тензија, која е тотално непотребна.

„Ако луѓето сакаат да живеат заедно имаат право така да живеат. Постои тенденција на далеку поголем број разводи од порано. Мислам дека не е само денеска, лагата и лицемерието постојат цело време, можеби во општестсво каде се малку изместени вредностите, лицемерието има повеќе простор да се шири. Лагата и лицемерието се на едно исклучително високо ниво.  Оние кои создаваат, ги рушат вредностите кои би требало да ги има во едно здраво општетсво, истите тие добиваат државни награди. Решението е во тоа, да дојдеме до дното и да се издигнеме како феникс. Но, мислам проблемот во оваа држава е што дното или не постои или е многу длабоко. Ние 30 години сме во зона на слободен пад“, вели Митковски.

Левенска смета дека е особено важно кога згаснуваат сијаличките во врската поради недоволна комуникација, личноста да се соочи колку е спремна да ги помине и надмине тие искушенија.

Митковски и Левенска го играат брачниот пар Михаил и Јована во „Лагата“. – Пред проба во МНТ. (Фото: К. Попов)

„Искреноста во една врска е силна кога е силна и љубовта. Ако партнерите сакаат да се борат и да имаат потреба за таа љубов . Се случува да згасне, но треба да се разговара, ако не може, секој да тргне по своја патека. Според мене, сѐ друго е лага, мазохизам кон себеси и нема потреба и не е крај на светот, ако одреден период човек е сам. Имам многу блиски луѓе кои после децении брак се разведуваат и се многу посреќни отколку кога биле во брак. Ние сме луѓе кои постојано бараме аргументи за нештата, оправданија, нема оправдување ако љубовта згаснала, но коренот е внатре, зошто дошло до тоа. За жал, има многу лица кои се заглавени во лавиринт и треба прво пред себеси да си ја кажат вистината“, ни рече Левенска.

Драмскиот текст го преведе Офелија Ковилоска, сценограф е Крсте С. Џидров, костимите се на Роза Трајческа-Ристовска, а музиката на Игор Василев-Новоградска.

Следните изведби на „Лагата“ се закажани на 21 и 29 октомври.

Б. НЕСТОРОСКА