Уникатно сценско доживување приреди вчеравечер на Охридско лето славниот американскиот актер, продуцент и режисер Џон Малкович. Две и полилјадната публика на Античкиот театар во Охрид уживаше во неговата брилијантна ексцентричност во „Пеколна комедија: Исповеди на сериски убиец”, напишана и режирана од Михаел Штурмингер. Солисти на вечерта беа сопраните Чен Реис и Сузан Лангбејн, во придружба на Оркестарот на Виенската академија и под диригентство на маестро Мартин Хазелбок.
„Оваа претстава ја сакам како што ја претставивме, бидејќи ги поврзува и театарот и класиката и глумата, а претставува нешто иновативно што ја привлекува публиката“, вели Малкович кој првпат настапува во земјава.
(Фото: Охридско лето)
Директорката на Охридско лето, Наташа Поповиќ, рече дека Охридско лето е предизвик, секоја следна година да биде поголемо и позначајно, да се надополнува и надградува со нови креативни соѕвездија кои го обележуваат неговото место како најпрестижна уметничка сцена, но и како препознатлив уметнички симбол насекаде во светот.
Американската вечер на Охридско лето се одржува со поддршка од Амбасадата на САД во земјава. Заменик-шефот на Мисијата во Амбасадата на САД во Скопје, Ерик Мејер, рече дека Американската амбасада има долга историја на соработка со Охридско лето, но и со многу други организации во Македонија со цел да ги засили врските преку програми кои ги поддржуваат македонското граѓанско општество и културните и образовни институции.
Малкович настапи со сопраните Чен Реис и Сузан Лангбејн, во придружба на Оркестарот на Виенската академија и под диригентство на маестро Мартин Хазелбок. (Фото: Охридско лето)
„Низ годините наназад, на сцените на Охридско лето сме ги прикажале најголемите културни богатства, вклучувајќи ги госпел и џез музиката, преку настапите на џез легендите како Артуро Сандовал, класичниот виолинист и виртуоз Шломо Минц, и многу други. Тие можеби донеле американска музика во Охрид, но излегле со балкански песни во своите срца“, кажа заменик-амбасадорот на САД, Мејер.
Вицепремиерката за добро владеење Славица Грковска, министерката за култура Бисера Костадиновска-Стојчевска, заменик-амбасадорот на САД Ерик Мејер, директорката на Охридско лето Наташа Поповиќ и Ристо Пенов, министер за локална самоуправа. (Фото: Охридско лето)
Холивудскиот актер со проектот „Вечер на Џон Малкович“, оценет како најексклузивен гостин на Охридско лето, предизвика огромен интерес кај публиката. Токму за овој настан беа направени бројни резервации од целиот регион но и од Бразил, Холандија, Франција, САД и од многу други земји.
С. ВРЕНЦОВСКА
