Македонската прозаистка и книжевна преведувачка Тања Урошевиќ почина денес во Скопје по тешко боледување. Како што велат од Друштвото на писатели на Македонија, таа важи за една од најквалитетните и најплодни преведувачки и афирматорка на руската книжевност во македонската културна средина.
Таа е сопруга на академик Влада Урошевиќ, еден од најзначајните македонски писатели, и мајка на реномираната уметница Вана Урошевиќ.
Тања Урошевиќ е авторка на романите „Аквамарин“ (2004), „Превид“ (2008) и „Ура, Арал!“ (2019), збирката раскази „Црвена нишка, магнетен прстен“ (2009), заедничката збирка раскази со Влада Урошевиќ „Размена на пораки“ (2013) и книгата „Три новели“ (2017). Член е на Друштвото на писатели на Македонија од 2017 година.
Има преведено и подготвено две антологии на руски раскази: „Ѓаволијада“ и „Кристален свет“ , а ги подготвила и преводите на македонски јазик на: „Мајсторот и Маргарита“ и „Театарски роман“ од Михаил Булгаков, „Доктор Живаго“ од Борис Пастернак, „Руска шума“ од Леонид Леонов, „Село“ од Иван Бунин, „Дарба“ од Владимир Набоков, „Писмата до Пастернак“ од Марина Цветаева и други.
Погребот е утре во 13 часот, а посмртните останки ќе бидат изложени во капелата на градските гробишта Бутел во Скопје во 12 часот.
