Поетот и преведувач Зоран Анчевски е годинашниот добитник на наградата „Браќа Миладиновци“, што ја доделуваат Струшките вечери на поезијата за најдобра поетска збирка објавена меѓу две фестивалски изданија. Анчевски е награден за поетската збирка „Збунети компаси“, во издание на „Или-или“.

Во 2018 година тој ја доби наградата „Браќа Миладиновци“ за стихозбирката „Небесна пантомима“.

Зоран Анчевски (1954) е поет, универзитетски професор и есеист. Има објавено девет поетски збирки, што се наградени во земјата и во странство, како што се наградата „Студентски збор“ за најдобра дебитантска книга („Патување низ скршени слики“, 1984) и меѓународната награда „Џакомо Леопарди“ во Италија (2004). Има објавено и есеи, критички осврти и студии за книжевната теорија.

Неговата најнова поетска книга „Збунети компаси“ е објавена во едицијата „Поеза“ на издавачката куќа „Или-или“.

Б. ЌАЕВ