Кинеските власти ги повикаа универзитетите да воведат „Љубовно образование“ за да ги потенцираат позитивните ставови за бракот, љубовта, плодноста и семејството, во обид да се зајакне наталитетот во земјата.

Пекинг промовира различни мерки за да го направи раѓањето деца попривлечно за младите парови, откако Кина лани, втора година по ред, регистрираше пад на населението. Кина има втора по големина популација во светот со 1,4 милијарди, но брзо старее, што ќе ги зголеми барањата за државните трошоци во иднина и ќе изврши притисок врз економијата.

„Студентите ќе бидат најголемиот двигател на плодноста, но тие значително ги променија своите ставови за бракот и љубовта“, стои во студијата на „Чајна популејшн њуз“.

„Колеџите и универзитетите треба да ја преземат одговорноста за обезбедување брак и љубовно образование на студентите преку нудење курсеви за образование за брак и љубов. Мерките ќе помогнат да се создаде „здрава и позитивна културна атмосфера за брак и раѓање деца“, се вели во публикацијата.

Демографите велат дека овие потези веројатно нема да имаат големо влијание кај младите Кинези. Околу 57% од анкетираните студенти рекле дека не сакаат да се заљубат, главно затоа што не знаат како да одвојат време за да ја балансираат врската помеѓу студирањето и љубовта.

Курсевите ќе можат да им помогнат „да ја подобрат нивната способност правилно да го разберат бракот и љубовта и да управуваат со љубовните врски“.