Доналд Трамп им посака среќа на неговата бивша снаа Ванеса и Тајгер Вудс, кои неодамна потврдија дека се во врска, додавајќи дека славниот голфер е фантастично момче.

Ванеса Трамп беше мажена за Доналд Трамп Џуниор 13 години и заедно имаат пет деца, а се разведоа во 2018, за време на првиот претседателски мандат на Трамп.

„Пресреќен сум што Ванеса повторно најде љубов. Тајгер ми се јави пред неколку месеци. Ние имаме многу добар, специјален однос. Многу сум среќен за двајцата, нека бидат среќни. Двајцата се одлични“, кажа Трамп кога новинарите го прашаа за нивната врска.

Благословот од Трамп дојде една недела откако Вудс на Инстаграм објави фотографија со Ванеса, признавајќи дека се вљубени.

„Имам играно голф со Тајгер неколкупати во изминатиот месец и тој е фантастично момче и фантастичен спортист. Ми кажа за нивната врска и му реков: ‘Тајгер, тоа е добро‘“, рече Трамп.

Вудс се разведе од сопругата Елин Нордегрен откако се дозна за неговите брачни неверства и сексуални скандали во 2009 и и потоа беше во врска со скијачката легенда Линдзи Вон.