Немо од Швајцарија победи на синоќешниот Евросонг во Малме, Шведска со песната „Кодот“ (The Code). Ова е трета победа на Швајцарија на Евросонг. Немо е едниот од двајцата небинарни пејачи на годинашниот натпревар за најдобра песна во Европа, покрај претставникот од Ирска.
Немо, роден во 1999 во Швајцарија, меѓу другите теми, пее за менталното здравје и родовиот идентитет.
На второ место се најде хрватскиот претставник Бејби Лазања, кој важеше за фаворит.
Немо освои 591 поен од гласовите на стручното жири и гласовите на публиката во сооднос 50:50, а Хрватска 547. На третото место е Украина со 453 поени. Најлош пласман имаше Норвешка со 16 поени. Теја Дора од Србија заврши на 17. место со 54 поени, а Раивен од Словенија е на 23. место со 27 поени.
Македонија не учествуваше на Евровизија втора година по ред, но продуцентот и композитор Дарко Димитров е дел од авторскиот тим на песната на Грузија која ја испеа Нутса Бузаладзе. Димитров е во Малме со евровизискиот тим на Грузија. Грузиската песна освои 34 поени и се пласираше на 21. место.
Холандскиот пејач Јост Клајн беше дисквалификуван од Евровизија по инцидент зад сцената.
Годинашниот Евросонг беше доста хаотичен и политички тензичен, со контроверзии за учеството на Израел. Типично веселиот настан – еден од најгледаните во светскиот културен календар – се претвори во превирања во последните денови, бидејќи организаторите се обидоа и не успеаја да го задржат гневот насочен кон делегацијата на Израел.
Но, Немо, кој беше меѓу фаворитите цело време, ја освои публиката со изведбата на „Кодот“, еден вид химна за нивното патување кон прифаќање на нивниот небинарен идентитет.
„Ви благодарам многу и се надевам дека овој натпревар ќе го исполни своето ветување и ќе се залага за достоинство и мир“, рече Немо откако ја прими статуетката од ланската победничка Лорин.
Дигиталните „АББА“ настапија во паузата помеѓу гласањето. За потребите на концертите „ABBA Voyage“ во 2022 беа создадени високотехнолошки, дигитални верзии на членовите на групата од 1970-тите, кои настапуваат во специјално изградена сала во Лондон.Придружувани од цел бенд, аватарите на „АББА“ изведуваат 20-ина песни за 90 минути, а специјалните ефекти и осветлувањето дополнително создаваат илузија на шведските поп-ѕвезди на сцената.
