Жителите на Монмартр во Париз алармираат дека се соочуваат со масовен туризам и се плашат дека нивната населба на врвот на ридот би можела да стане следната Барселона или Венеција, бидејќи бројот на туристи се зголеми по минатогодишните Олимписки игри.

Иако во Париз досега немаше големите протести како во Шпанија и Италија, некои од неговите најзначајни области почнуваат да го чувствуваат притисокот. Локалното население кое живее на Монмартр вели дека е итно потребна промена.

Ан Реноди, која живее во областа 29 години и е на чело на здружението „Живеј на Монмартр“, рече дека историскиот кварт, кој стана познат по филмот „Чудесната судбина на Амелија Пулен“ од 2001 година, сега наликува на забавен парк.

„Луѓето доаѓаат на три часа, се забавуваат, купуваат беретка или палачинка и си заминуваат – како да се во забавен парк“, изјави таа за „Ројтерс“. Во меѓувреме, се затвораат малите продавнички за основни производи, што се неопходни за жителите, а никнуваат тезги за грицки и за сувенири.

„Останавме на две или три месарници, две продавници за сирење. Тие исчезнуваат една по друга. Сега има многу места за сладолед, палачинки, тако“, вели таа.

Нејзиното здружение предложи мерки до Градското собрание слични на оние во другите европски туристички центри: ограничување на туристичките групи на 25 лица, забрана на звучници и зголемување на туристичкиот данок.

Туризмот во парискиот регион достигна 48,7 милиони посетители во 2024 година, при што околу 11 милиони го посетуваат Монмартр годишно, главно за да ја видат базиликата Свето срце. Тесните улички се преполни со туристички групи, што ги фрустрира локалните жители.

„Понекогаш навистина морам да викнам гласно: ‘Извинете, сакам да поминам’“, вели Антеа Квенел, 44, мајка на две деца.

Париските власти велат дека 2025 година се очекува да биде богата туристичка година, со зголемување од 20% на резервациите во јануари во однос на истиот месец минатата година.