Во текот на годинава, документиравме 4 случаи на одбивање на здравствена услуга на пациент и поради тоа што се ХИВ-позитивни и 3 случаи во кои им била повредена доверливоста на медицинските податоци, велат од Здружението „Заедно посилни“. Денеска е Светскиот ден на СИДА, и тие апелираат до одговорните тела и институции да му посветат посебно внимание на овој проблем при санкционирањето на случаи на дискриминација врз основа на ХИВ-статусот.
„Стигмата значително влијае врз квалитетот на живот на луѓето со потврдена ХИВ-инфекција, а истовремено и ги одвраќа другите луѓе да направат ХИВ-тест тогаш кога треба“, вели Здружението.
Според Светската здравствена организација (СЗО), ХИВ и понатаму останува глобален проблем за јавното здравје. Повеќе од два милиони луѓе во Европскиот регион на СЗО се погодени од ХИВ. Оценката на СЗО е дека во последните неколку години нема напредок кон постигнување на целите за ХИВ. Намалени се ресурсите, а како резултат на тоа, голем број животи се загрозени. Во земјава, до 2022 година од ХИВ/СИДА починале 123 лица, а 451 лице живее со ХИВ/СИДА.
Во текот на октомври, согласно податоците објавени од Институтот за јавно здравје, регистрирани се пет нови случаи . Сите пријавени се со ХИВ. Регистриран е и еден смртен случај од ХИВ/СИДА.
Државата има одговорност, вели Здружението, да вложи во докажаните мерки што ќе придонесат за намалување на бројот на нови инфекции и конечно ставање крај на оваа епидемија.Тие вклучуваат: широка достапност на бесплатно ХИВ-тестирање, достапност неможноста за самотестирање за ХИВ, услуги за сексуално здравје ослободени од стигма, обезбедување средства за превенција, како кондоми и лубриканти, предекспозициска профилакса и стерилен прибор за инјектирање, подигнување на свесноста, како и сексуално образование прилагодено на возраста.
„Обврска на Владата е да осигури непрекината достапност на современа антиретровирусна терапија за пациентите со ХИВ и да ги заштити овие како и сите други граѓани од стресот предизвикан поради проблемите во обезбедувањето налекови. Се проценува дека до крајот на минатата година со ХИВ живееле 38,4 милиони луѓе во светот, од коишто 85% биле свесни за својот статус, а 75% примале антиретровируснатерапија. Наспроти тоа, во истата година само 66% од проценетите околу 550 лица со ХИВ во Северна Македонија биле свесни за својот ХИВ-позитивен статус, а 59% биле на терапија. Ова укажува дека нашата земја треба да вложи многу посериозни напори за унапредување на насочените програми за превенција и тестирање, за кои е докажано дека даваат резултати и се дел од националната програма за ХИВ“, велат од „Заедно посилни“.
Здружението за вечерва организира добротоворна забава под мотото „Заедно погласни“ во 20 часот во барот Сома.
Б. НЕСТОРОСКА
