Апелацискиот суд Скопје ја преиначи одлуката на Основниот суд Скопје 1 и дозволи „бомбите“ да се користат како докази во судската постапка во случајот на СЈО „Тендери“, во кој што е обвинета поранешната министерка за култура Елизабета Канческа-Милевска, објави државната агенција МИА.

Одлуката е донесена врз основа и на претходните две одлуки со кои што Апелацискиот суд реши дека „бомбите“ можат да бидат доказ во предметите „Насилство во Центар“ и „Триста“. Основниот суд ги одби прислушуваните разговори како докази на 27 септември во „Тендери“, по што СЈО поднесе жалба до Апелација.

Апелацискиот суд на две јавни седници утре ќе одлучува дали бомбите ќе бидат докази и во предметот „ТНТ“ за уривањето на станбениот комплекс „Космос“ и во предметот „Топлик“ за случајот „Сончев град“.
Во случајот „Тендери“ обвинета е Канчевска-Милевска за тендерот за извршување градежни работи во Музејот на ВМРО, од проектот „Скопје 2014“. Во „Топлик“ осомничени се шест лица од Министерството за транспорт и врски за изградба на „Сончев град“.