Членството во НАТО е најголемиот придонес за безбедноста и стабилноста на Северна Македонија, најсилната гаранција за заштита на територијалниот интегритет и суверенитет и важен предуслов за благосостојба на граѓаните. Ова беше кажано на денешната трибина „Пет години членство на Република Северна Македонија во НАТО: Постигнувања, перспективи и предизвици“, што се одржа во Домот на АРМ во Скопје, во организација на Дипломатскиот клуб – Скопје и Здружението на ветераните и резервистите од областа на одбраната и безбедноста.

Министерот за одбрана Владо Мисајловски рече дека државата повеќе не е објект во геополитичките дискусии, туку субјект кој активно придонесува во носењето на одлуки. Тој додаде дека во моментов Министерството за одбрана го има најголемиот буџет во овие децении, што овозможува модернизација на армијата и инвестиции во човечкиот потенцијал.

„Имаме две стратешки цели, НАТО и ЕУ. За жал, сè уште сме надвор од ЕУ семејството, иако дадовме многу жртви. Пред нас се сложени времиња. За жал, на европското тло има повеќе од три години војна, но не само на европското тло, туку и надвор од границите на континентот имаме загрижувачка безбедносна ситуација. Она што е важно за нас како држава, е да имаме над 2 проценти буџет, во овој момент тоа го имаме. Треба да се разговара и за регионалниот пристап, треба да се разговара што е најпотребно за нашата Армија, но исто така и да помагаме на сите наши сојузници и пријатели. За да бидеме едно големо семејство, треба да ги достигнуваме сите оние постапки што ги прават големите земји во НАТО“, рече Мисајловски.

Генералот во пензија Павле Арсоски кажа дека членството во НАТО секогаш имало силна поддршка од граѓаните и широк консензус. Тој додаде дека државата во минатата година инвестирала 2,05 отсто од БДП за одбрана, или 327 милиони евра, и дека се исполнуваат целите поставени од НАТО.

„Сепак сведоци сме дека и 10 години по НАТО самитот во Велс, 1/3 од државите членки сè уште го немаат достигнато тоа на што се обврзале. И годинава, исто како и минатата, речиси една третина од буџетот за македонската одбрана е наменет за модернизација и опремување на Армијата процес кој започна пред приближно пет години и е во напредна фаза, со што се исполнува и критериумот за зацврстување на капацитетите на националната и колективната одбрана на НАТО. И ова не останува незабележано. Сојузниците го поздравуваат напредокот на Македонија и ја охрабруваат земјата да продолжи да ја развива одбраната“, рече Арсоски.

Генералот во пензија Илија Николовски кажа дека пристапувањето во НАТО претставува важен и историски чин, кој гарантира безбедност на границите и овозможува активно учество во носењето на геостратегиски одлуки.

На трибината се дискутираше и за предизвиците со кои се соочува НАТО, како што се војната во Украина и зголемените инвестиции во одбраната од страна на европските земји членки.