На одбележувањето на 82 години од депортацијата на македонските Евреи од страна на бугарскиот фашистички окупатор, премиерот Христијан Мицкоски кажа дека наша обврска е да зборуваме секој ден за тоа и да не дозволиме нови генерации да пораснат без да ја знаат вистината.
Со помош на бугарската фашистичка окупаторска власт, на 11 март 1943 од Битола, 3.351 лице од еврејско потекло, заедно со другите Евреи од Македонија, беа одведени во логорите на смртта во Треблинка, од каде што ниеден не се врати. 7.144 Евреи или 98% од вкупното еврејско население од тоа време беа депортирани во Треблинка. Дел од младите Евреи кои се извлекле од блокадата се приклучиле кон партизанските единици во Народноослободителната борба.
„Пред Втората светска војна, во Македонија живееше динамична, просперитетна и богата еврејска заедница. Евреите беа не само граѓани, туку и значаен дел од културниот, економскиот и социјалниот живот. Нивното присуство беше дел од нашата историја со векови. Таа година во март, тогашната фашистичка бугарска окупациска власт, во координација со нацистичките власти, наредија апсење и депортација на сите Евреи од тогашната Вардарска Македонија. 7.144 мажи, жени и деца беа присилно собрани и одведени во привремениот логор во Скопје, во објектот на тогашниот ‘Монопол’. Цела една заедница, цели семејства, цели генерации беа загубени“, кажа Мицкоски.
Тој додаде дека кога злото се шири, кога неправдата се врши, кога насилството станува правило, ако луѓето молчат тогаш злото победува и затоа според него, наша обврска денес, како и секој ден, е да зборуваме, да не дозволиме нови генерации да пораснат без да ја знаат вистината, да не дозволиме омразата да најде ново тло за да никне, да се бориме против секоја форма на антисемитизам, дискриминација и омраза, да ги учиме нашите деца дека толеранцијата, хуманоста и солидарноста се темелите на едно праведно општество и да не молчиме пред неправда.
„Македонија е земја на различности, земја која отсекогаш била дом за многу култури, религии и народи. Тоа е нашето богатство, нашата сила. Еврејската заедница, иако речиси уништена за време на Холокаустот, останува дел од нашата историја, нашето секојдневие, нашата иднина, нашето културно наследство и нашата совест. Затоа, денес, додека стоиме овде, нека нашето сеќавање не биде само минато, туку и повик за иднината. Нека нивната трагедија ни биде лекција, нека нивните животи ни бидат потсетник, нека нивната болка ни биде опомена“, рече Мицкоски и повтори: „Никогаш да не се заборави! Никогаш повеќе!“
