Поради густата магла во Скопје изминатите два дена беа откажани или пренасочени десетина летови од Меѓународниот аеродром Скопје, а дел слетуваат со поголемо доцнење.

Вчера, првин беше откажан летот од Малме кој требаше да слета веднаш по полноќ, за потоа да слета попладнето со тричасовно доцнење, според податоците за пристигнувања на Скопскиот аеродром.

Вечерта пак беа пренасочени во Приштина пет лета, три од Германија и по еден од Италија и Швајцарија, а откажани беа летовите од Истанбул и Базел.

Вечерта на 31 декември, исто така, најмалку три лета беа пренасочени во Приштина, па следното утро авионите долетаа оттаму во Скопје за да земат патници.

Утринава, првиот лет од Истанбул слета со два часа задоцнување, а вториот лет од турскиот град исто така треба да слета со два часа задоцнување.

Според временските прогнози, и денеска се очекува магла во скопската котлина, а разведрување и потопло време се очекува од утре.