Власта и опозицијата заеднички ќе работат на законите кои се дел од реформската агенда на земјава. Ова е договорено на денешната средба меѓу лидерот на опозициската СДСМ Венко Филипче и премиерот Христијан Мицкоски. Како што кажа Филипче, средбата со премиерот во владата била добра и конструктивна и има волја од двете страни за соработка.

„Сметам дека и до премиерот јасно е стигната порака од граѓаните дека е потребна заедничка соработка од одредени сфери кои се важни да го подобрат животот. Договоривме да се направат заедничките работни групи пред сè во делот за спроведување на реформската агенда за законите кои треба да стигнат во Собранието во делот на правосудството, енергетиката и некои работи во однос на стретешки проекти во здравството. Јас во наредните денови ќе номинирам неколку експерти од правосудството и енергетиката кои ќе работат на законите кои се дел од реформската агенда“, кажа Филипче после средбата во Владата.

Следбата следи откако вчера Филипче на прес-конференција предложи концепт за нов општествен и политички дијалог, и најави дека ќе побара средба со премиерот за да му го презентира овој концепт. Филипче вчера рече дека по трагедијата во Кочани, граѓаните реагираат со револт и бес поради системските пропусти, за кои одговорност сносат сите политички партии.

На средбата се разговарало и за уставните измени, но како што кажа Филипче, за ова прашање тој и премиерот имаат различни ставови, па оставено е за него да се разговара дополнително.

Прашан за коментар за најавите на власта за повторно отварање на случајот со модуларната болница во Тетово, Филипче рече дека не стравувува од ништо.

„Ако било кој смета дека било кој случај од минатото треба да се отвори, јас тоа го поддржувам“, додаде Филипче.

Лидерот на СДСМ во септември 2023 година кога во пожар во модуларната болница за ковид во Тетово загинаа 14 луѓе беше министер за здравство. Тој тогаш понуди оставка, но тогашниот премиер Зоран Заев не му ја прифати.

А. АНТЕВСКА