Премиерот Христијан Мицкоски вели дека одложувањата на повратот на ДДВ произлегуваат од зголемување на контролите и ревизиите. Тој вели дека Владата ја признава фрустрацијата на чесните бизниси погодени од овие одложувања.

„Овие одложувања произлегуваат од неопходното зголемување на контролите и ревизиите за да се решат прашањата за измами и манипулации, кои се идентификувани. Владата ја признава фрустрацијата на чесните бизниси погодени од овие одложувања и е посветена на минимизирање на нивното влијание. Истрагите открија обиди на некои компании да го искористат системот за ДДВ преку лажни барања или други измамнички практики. Засилените контроли се од суштинско значење за заштита на јавните средства и за обезбедување правичност во даночниот систем“, кажа Мицкоски, одговарајќи на новинарско прашање на поставување камен темелник на изградба на фабрика за електронски батерии за автомобили во ТИРЗ Кичево.

Мицкоски додаде дека за чесните компании нема за што да се грижат, повратот на средствата ќе се обработува со минимална контрола, намалувајќи ги доцнењата.