Лидерот на опозициската СДСМ Венко Филипче денеска на прес-конференција предложи концепт за нов општествен и политички дијалог. Тој вели дека по трагедијата во Кочани, граѓаните реагираат со револт и бес поради системските пропусти, за кои одговорност сносат сите политички партии. Филипче најави дека ќе побара средба со премиерот Христијан Мицкоски за да му го презентира овој концепт.

Според лидерот на СДСМ, областите кои бараат системски пристап се образованието, здравството, правосудството, животната средина, како и проблемите со партизацијата и политизацијата.

„Партизацијата и политизацијата се проблемите кои најмногу ги иритираат граѓаните. Мора да ги ослободиме институциите од партиските влијанија за да овозможиме фер систем на вработување и напредување на младите луѓе. Само така можеме да ја издигнеме експертизата на заслуженото ниво“, рече Филипче, додавајќи дека е важно лидерите на сите партии да седнат на заедничка маса и да разговараат за овие теми.

Филипче додаде дека детално ќе му го образложи планот на премиерот Мицкоски на средба во следните денови, со надеж дека и другите политички партии ќе се приклучат на дијалогот.

„Крајно време е да престанеме да зборуваме за промени и да почнеме да работиме на нив. Трагедијата во Кочани ги покажа системските пропусти и мислам дека сите треба да седнеме и заедно да работиме за доброто на државата“, заклучи Филипче.

Во однос на неговите очекувања, Филипче рече дека уште денеска или утре ќе побара средба со премиерот Мицкоски за да се организира лидерска средба.