Лицата со посебни потреби и нивните родители секој 20-ти во месецот ќе креваат камп пред Собрание и ќе кампуваат по три дена, и по формирање на Владата. Тие најавуваат дека нема да отстапат од нивните барања за измена на повеќе закони и подзаконски акти, со кои треба полесно да ги остварат загарантираните права.
„Потписи за иницијативата за измена на законите ќе се собираат до петок во сите градови во земјава. Во Скопје веќе се собираат на неколку места. Немаме точна бројка колку потписи се собрани, бидејќи секој момент се менуваат бројките“, вели Сузана Стојановска од здружението на лица со Даунов синдром „Трисомија 21“.
Вчера беа собрани над 6.000 од потребните 10.000 потписи за да влезе иницијативата во процедура во Собрание.
„За утре веќе имаме закажано разговори во некои министерства. Сега немаме Влада, но на состаноците ќе одиме да им кажеме дека нема да отстапиме од нашите барања. Без оглед кој ќе формира Влада нашите барања остануваат и ние секој 20-ти во месецот ќе бидеме пред Собрание, и по формирање на Владата. Имаме поддршка и од Народниот правобранител и од Хелсиншкиот комитет и лужето разбираат дека нашите барања се оправдани, затоа имаме толку масовна поддршка“, вели Стојановска.
Од повеќето барања за законски измени, како што вели Стојановска, иако сите се важни и приоритени, таа сепак би го издвоила она со кое се бара укинување на старосната граница од 26 години. Со зегашните законски одредби по навршување на оваа возраст лицата со посебни потреби немаат право на посебен паричен додаток, ниту на бесплатни лекови. Стојановска вели дека со навршување на 26 години, попреченоста не поминува и дека тоа е класичена дискриминација.
„Бараме да се отворат дневни центри за да има каде да ги оставиме децата и да можеме да одиме на работа, а не како што е сега случајот повеќето од нас не можат да работат, бидејќи нема кој да се грижи за децата. Има и ред други барања“, вели Стојановска.
Родителите на деца со посебни потреби од 20-ти до 22-ри овој месец во шатори кампуваа во паркот Жена Борец спроти Собрание, за како што рекоа политичарите и надлежните да ги видат и да ги чујат проблемите со кои се соочуваат.
