Гувернерот Димитар Богов најави дека Народна банка ќе побара измени во законската регулатива за одговорност на лицата и на медиумите кои шират шпекулаци кои можат да го загрозат банкарскиот сектор и да предизвикаат негативни економски последици.

Веќе се прават анализи каква е меѓународната пракса за ваквите ситуации. „Ги проучуваме праксите во современиот свет, соработуваме со меѓународни финансиски институции и некаде тоа е регулирано во закон за банки, а некаде во кривичниот законик“, рече Богов.

Поводот за ова се априлските шпекулации за наводна девалвација на денарот и вештачки создадената криза на менувачкиот пазар на девизи, кога граѓаните повлекоа рекордни 58,5 милиони евра, а Народна банка интервенираше со 77 милиони евра на пазарот.

На седница на Комисијата за финансирање и буџет гувернерот вчера истакна дека британското напуштање на ЕУ нема да се одрази на девизниот курс и сигурноста на банкарскиот сектор.  „Курсот на денарот е стабилен, нема дилеми за инфлација, гарантираме дека нема да има потреси за извозниците“, рече гувернерот на Народна банка, Димитар Богов по повод излегувањето на Велика Британија од Европска Унија и можните реперкусии врз македонската економија.