Дванаесет закони од областа на здравството се анализираат од претставници на лекарски здруженија, синдикати, комори и тимови од Министерството за здравство, за да бидат синхорнизирани и да не се кочат процесите во здравствениот систем, рече денеска министерот за здравство Азир Алиу.

Станува збор за измени и унапредувањата на законите за евиденции во областа на здравството, за здравствената заштита, за здравственото осигурување, за лекови, за медицински средства, за јавно здравје, за заштита на населението од заразни болести, за заштита од пушењето, за биомедицински потпомогнато оплодување, за комплементарна и алтернативна медицина, за земање и пресадување на делови од човечкото тело заради лекување, за санитарна и здравствена инспекција.

„Не случајно се одбрани овие 12 закони. Прво, имаме моменти кои не се предвидени во законската рамка и второ, имаме моменти во кои едниот закон предвидува едно, а друг закон друг тип на процеси. Затоа и ги отворивме тие 12 закони, работните групи веќе анализираат и сега идејата е да бидат синхронизирани со цел процесите во здравствениот систем да не се кочат. Конкретно ништо не можам да ви кажам, бидејќи сега засега отвораме дискусија за 12 закони. Работните групи веќе имаат анализа, и денеска ќе бидат отворени да почнеме од долу да правме анализа, како може да се додадат нови членови во законите. Овие закони не се нови, туку ќе бидат обработени и адаптирани да бидат синхронизирани еден со друг“, кажа Алиу.

На новинарски прашања за конкретни проблеми, како на пример, како се косат Уставот и Законот за заштита од заразни болести кога се во прашање невакцинирани деца, Алиу рече дека во оваа фаза не може да даде конкретни одговори, но, дека токму затоа се отворени овие закони кои не се синхорнизирани.

На прашање за тоа ќе се регулира дополнителната дејност на лекарите и тоа што во некои здравствени установи, доктори работат прва смена и веќе од 14 часот во втора смена прегледуваат и граѓаните плаќаат на приватно, Алиу рече дека не само тие информации, дека имаат уште многу други такви кои се предмет на анализа.

„Ние сме свесни, имаме и други наоди знаете, не се забранети со закон, но се злоупотребуваат од здравствениот систем. Тој тип на несихронизирани закони ни прави проблеми и како Министерство и како здравствен систем“, рече министерот.

Б. НЕСТОРОСКА