Комеморативната седница за прерано починатиот маестро, Саша Николовски-Ѓумар е задутре во 11 часот во Македонската опера и балет, соопштуваат од факултетот за музичка уметност во Скопје, кадешто Николовски беше редовен професор.

Посмртните останки ќе бидат изложени во Капелата на градските гробишта „Бутел” од 13 часот, а погребот ќе се одржи во 14 часот.

Од ФМУ велат дека проф. м-р Саша Николовски-Ѓумар зазема значајно место во македонската музичка историја, помеѓу музичките великани.

„Студентите, неговите колеги и соработници ќе го паметат по неговиот влог во македонската музика, неговата педагошка дејност, по неговиот раскошен талент и музикалност.

Маестро Саша го красеа вистински човечки епитети, скромност и доследност, ненаметлив, духовит, човечен.

Македонија и македонската музичка сцена, изгуби голем уметник и човек, тој живееше на сцената, дишеше заедно со своите музичари, со неговиот поглед, израз, став, харизма, тој самиот беше музика”, вели Факултетот за музичка уметност.