Комерцијална банка ќе обезбеди финансиска поддршка од 30 милиони денари (485.000 евра) за новата фондација „Заедно за едно“, основана во рамките на Македонската банкарска асоцијација за да помогне на повредените и семејствата на настраданите во пожарот во дискотеката „Пулс“ во Кочани на 16 март, во кој загинаа 61, а повредени се околу 200 лица. Овој износ банката ќе го донира на Фондацијата за 2025 година, а за наредните години, согласно потребите на настраданите и можностите на банката, ќе се носат посебни одлуки.

Комерцијална банка е и еден од основачите на фондацијата „Заедно за едно“, која има за цел да обезбеди долгорочна финансиска поддршка и грижа за настраданите лица и за нивните најблиски.

„Значајните донации што во наредниот период ќе ги обезбеди Комерцијална банка преку новата фондација претставуваат конкретен израз на нашата желба да им помогнеме на повредените, нивните најблиски, како и на семејствата на загинатите со помалку болка и тешкотии да се справат со последиците од оваа ужасна трагедија. Банката ќе донира финансиски средства за долгорочна помош за настраданите и нивните семејства, кои ќе бидат наменети за задоволување на основните потреби (храна, облека, сместување, лекови), покривање трошоци за медицински третмани, операции и рехабилитација, поддршка за менталното здравје и за стипендии и грантови за поддршка во образованиот процес и во професионалната реинтеграција“, објави Комерцијална банка.

Сите потребни информации ќе бидат објавени на веб-страницата mba.mk.