Од денеска, Македонија официјално го започнува претседавањето со Организација за безбедност и соработка на Европа (ОБСЕ), најголемата светска регионална безбедносна организација која опфаќа 57 држави учеснички од Европа, Северна Америка и Азија.

Од Министерството за надворешни работи велат дека под слоганот „За луѓето се работи“ фокусот на македонското претседавање ќе биде ставен врз хуманата безбедност во ера на регионална и глобална несигурност и нестабилност.

„Во наш фокус, како земја претседавач, ќе бидат теренските мисии. Ќе преземеме и поддржиме конкретни активности со цел олеснување на животот на луѓето, унапредување на нивните права и слободи“, вели министерот Бујар Османи.

Како што велат од МНР, освен фокусот врз кризните региони, а пред сè, воената агресија врз Украина, приоритетите на Северна Македонија како претседавач ќе бидат реафирмацијата на придобивките на ОБСЕ и обновување на дијалогот и довербата, како и инвестирањето во мирот и отпорноста на ОБСЕ, како најдобар начин за справување со безбедносните предизвици.

„Северна Македонија досега многу пати го покажала својот капацитет, дека преку политички дијалог, демократски средства и демократско владеење ги остварува своите цели како на домашен, така и на меѓународен план. Сега имаме можност со таа наша зрелост и знаење да бидеме клучен играч, да ги водиме и да придонесуваме за меѓународните политики и процеси“, вели Османи.

Претседавањето на Македонија со ОБСЕ ќе трае во текот на целата 2023 година, а Османи ќе ја презентира програмата на програмата на македонското претседавање, пред Постојаниот совет на ОБСЕ , во Виена на 12 јануари.