Три лица утринава во Кавадарци претепале до смрт 43-годишник. Смртта му била констатирана во 05.25 часот.
Ова не е изолиран случај, зашто последните неколку билтени на Министерството за внатрешни работи се полни со тепачки низ цела Македонија. Се тепаат малолетници, возрасни лица тепаат и повредуваат свои и туѓи деца, пријавена е и мајка што го претепала своето дете, тепани се луѓе во свој двор, се бодат со ножеви на јавно место…
„Во 04.56 часот во ОВР Кавадарци било пријавено дека на заден влез од казино на ул.’Никола Минчев’ во Кавадарци неколку лица физички нападнале едно лице, кое паднало на земја и на кое му била потребна помош. Полициски службеници од ОВР Кавадарци излегле на местото и констатирале дека се работи за лицето П.Т.(43) од Кавадарци, кај кое и покрај укажаната помош, екипа од Итна медицинска помош во 05:15 часот констатирала смрт“, соопшти МВР.
Набргу потоа, а поради сомнение за инволвираност во настанот, од слобода биле лишени Д.Б.(26), М.Ѓ.(35) и Д.С.(27), сите од Кавадарци. Тие биле приведени и задржани во полициска станица.
Јавен обвинител од Основното јавно обвинителство Кавадарци и полициски службеници вршат увид на местото, на надзорните камери од казиното и по целосно расчистување и документирање на случајот, против сторителите ќе биде поднесена соодветна пријава.
На 25.08.2025 околу 11:00 часот во СВР Скопје, од КПУ Идризово било пријавено дека во установата, затворски полицаец бил физички нападнат од осуденикот К.А.(33) од Скопје. Се преземаат мерки за расчистување на случајот.
На 25.08.2025 во 23:40 часот во СВР Скопје било пријавено дека на подрачјето на Центар бил нарушен јавниот ред и мир со физичка пресметка помеѓу И.К.(37) и Р.О.(34), двајцата од Скопје.
Во Аеродром мајка претепала малолетен син.
„На 25.08.2025 во 13:30 часот во СВР Скопје, 65-годишен маж од Скопје пријавил дека на 24.08.2025 околу 12:00 часот во семејниот дом на подрачјето на општина Аеродром неговиот малолетен син бил физички нападнат од неговата мајка Т.Т.“, наведено е во последниот билтен на МВР.
Во Групчин, пак, мајка Р.А. (49) пријавила дека нејзиниот 15-годишен син бил нападнат и натепан од познаници.
„На 25.08.2025 во 11:30 часот во Полициското одделение Галате, С.А.(39) од с.Добри Дол, гостиварско, пријавил дека околу 08:45 часот на работното место во приватна фирма во с.Неготино, општина Врапчиште, бил физички нападнат од едно машко лице.
Истиот ден во Полициското одделение Камењане, Ф.Р. од с.Камењане, општина Боговиње, пријавил дека околу 18:00 часот во неговиот двор, по претходно нерасчистени имотно- правни односи, бил физички нападнат од А.А.. По целосно документирање на случајот ќе следува соодветен поднесок“, велат од МВР.
Истовремено, И.Ч.(31) од Скопје пријавил дека околу 01:00 часот на подрачјето на Центар, по претходно недоразбирање, тој и негов пријател биле физички нападнати од две лица, кои употребиле тврд и остар предмет.
На 25.8.2025) во 02:10 часот во СВР Скопје, У.Р.(24) од Скопје пријавил дека околу 01:50 часот во с.Горно Лисиче, скопско, бил физички нападнат од едно лице. Се преземаат мерки за расчистување на случајот.
На 24.8.2025 во СВР Штип било пријавено дека околу 11:40 часот на игралиштето „Бело брдо“ во Штип, за време на одигрување на првенствен фудбалски натпревар помеѓу екипи на помлади пионери на ФК „Брегалница“ од Штип и ФК „Шкупи“ од Скопје, А.А.(43) од Скопје, родител на фудбалер од ФК „Шкупи“, физички нападнал двајца малолетници од Штип, фудбалери на ФК „Брегалница“, и им нанел повреди. Веднаш по нападот, полициски службеници од СВР Штип го лишиле од слобода А.А., а малолетниците биле пренесени во Клиничка болница Штип за укажување помош. Во врска со настанот во СВР Штип, во присуство на родители и претставник на Центар за социјални работи Штип, бил извршен службен разговор и со двајца малолетници од Скопје, фудбалери на екипата на ФК „Шкупи
Претходниот ден, на 24.8.2025 во 11:00 часот во СВР Тетово, В.В.Ц.(48) од Тетово пријавила дека на 23.8.2025 околу 23:30 часот во Тетово, нејзиниот малолетен син бил физички нападнат од едно лице.
На 24.8.2025 во 22:00 часот во СВР Тетово, Б.Ј.(34) од с.Копачин Дол, општина Желино, пријавил дека околу 21:00 часот во парк во Тетово, неговиот 14-годишен внук бил физички нападнат од неколку лица, кои користеле разни предмети.
На 24.8.2025 во 22:50 часот во Полициското одделение Јегуновце, В.Р.(54) од с.Сиричино, општина Јегуновце, пријавил дека околу 22.30 часот во истото село, неговиот малолетен син бил физички нападнат од двајца малолетници од с.Прељубиште, кои ги познавал.
На 24.8.2025 во 00:30 часот во СВР Скопје, И.А.(36) од Куманово пријавила дека околу 00:10 часот во с.Бунарџик, скопско, била физички нападната од Д.С., кој потоа го турнал и нејзиниот татко.
На 24.8.2025 во 23:10 часот во СВР Скопје било пријавено дека на подрачјето на Ѓорче Петров во Скопје, по претходна расправија, бил нарушен јавниот ред и мир со физичка пресметка помеѓу А.Е.(53) и Ф.Е.(29) од една страна и Е.П.(37) од друга страна, сите од Скопје. По целосно документирање на случајот, ќе следува соодветен поднесок.
На 24.8.2025 во 20:30 часот во СВР Скопје, 35-годишна жена од Скопје пријавила дека околу 14:30 часот во семејниот дом на подрачјето на Кисела Вода била физички нападната од нејзиниот сопруг И.М., кој употребил и тврд предмет.
На 24.8.2025 во 21:00 часот во СВР Скопје, А.Б.(29) од Скопје пријавила дека околу 17:40 часот на подрачјето на Гази Баба, нејзината малолетна ќерка била нападната со тврд предмет од друг малолетник.
Замав зема и палењето автомобили низ државата, па за овие два дена, опожарени и оштетени се три автомобили.
С. К. ДЕЛЕВСКА
