Покрај уплатените 833-те илјади дози за вакцинација и ревакцинација на 400 илјади граѓани преку ковакс механизмот, Македонија има аплицирано за уште 800 илјади дози преку друг механизам на ЕУ, кажа премиерот Зоран Заев на денешната прес-конференција за плановите за идната година. Понатаму, тој кажа дека земјава започнува преговори за директна набавка од производителите на вакцини за ковид-19. За складирање на вакцините, тој кажа дека се набавуваат фрижидери за сите типови на вакцини.

„Имаме уплата за 833 илјади вакцини за популација од 400 илјади граѓани за вакцинација и ревакцинација во рамките на ковакс механизмот. Согласно планот за дистрибуција, вакцините се очекуваат во првите месеци од 2021 година. Покрај овој механизам, започнуваме преговори и за директна набавка од компании кои ги произведуваат вакцините. Предвиден е и трет механизам преку Европската унија која е во постапка за набавка за 200 милиони дози за земјите членки и за уште дополнителни 100 милиони за земјите од Европа надвор од ЕУ. Ние аплициравме за дополнителни 800 илјади дози од овие 100 милиони. Се подготвуваме и набавуваме фрижидери за секој тип вакцини и за сите температури. Ова е така бидејќи ќе има повеќе достапни вакцини кои сигурно ќе ги користиме, а се складираат на различни температури“, кажа Заев.

Тој објасни дека Бирото за јавни набавки треба да најде решение како да се набават директно вакцините, бидејќи за јавни набавки се потребни огласи и тендери, а сега ни треба брзо решение за да ги почнеме преговорите со производителите.

„Од Бирото не очекуваме одговор ‘не може’, туку да најдат начин како тоа да се изведе“, рече Заев.