Повеќе од 60 отсто од жените во Македонија најмалку еднаш се соочиле со онлајн насилство, додека една од десет жени е жртва на злоупотреби на интернет секој ден, покажа анкетата што ја спроведе Програмата за развој на Обединетите нации (УНДП), во која учествуваа 311 испитанички.

Автентичните сведошта на три девојки и жени од оваа анкета се објавени во три видеа кои се дел од кампањата „И онлајн насилството остава лузни“. Девојките и жените се соочиле со онлајн закани, уцени, вознемирувања и со објавување интимни содржини на интернет без согласност. Во видеата биле ангажирани три млади актерки кои ги пренесоа стравот и траумите со кои се соочиле жртвите.

„Кампањата е со цел да се зголеми свесноста за присуството на овој вид насилство и да се информираат жртвите како да го препознаат и пријават насилството. Преку видеата се доловуваат насилството, траумите и стравот со кои се соочуваат жртвите на насилство на интернет и се охрабруваат и информираат како да го пријават случајот во полиција“, велат од УНДП.

„Многу ми е страв! Тој ми се закани дека ќе објави фотографии од мене како се туширам и сум гола на Фејсбук, без моја согласност“.

„Ме демнеше маж на социјалните мрежи преку лажни профили и ми ги следеше активностите на интернет. Ме уценуваше да се омажам со него за да запрат демнењето и вознемирувањето. Ми се закани и дека ќе ме убие“.

„Имам 17 години. Група малолетни машки лица сексуално ме вознемируваше и снимката од тоа ја објави на интернет“.

Онлајн родово-базирано насилство е секоја форма на демнење, вознемирување, закани, родово-базиран говор на омраза и споделување интимни содржини без дозвола и во најголема мера е насочено кон жените и девојките. Овој тип насилство може да се пријави во полициска станица или на електронската адреса [email protected].