Нема пет лекови за третман на пациентите на Клиниката за онкологија и радиотерапија, а директорот на Фондот за здравствено осигурување (ФЗОМ) Сашо Клековски вели дека очекува неделава да се надмине недостигот на два лека, а другите лекови ќе бидат набавувани во соодветни постапки и тие ќе бидат за брзо време достапни. Пациенти од Онкологија вчера реагираа дека нема лекови за биолошка терапија.

„За да се надмине проблемот, треба да се знае зошто е настанат проблемот. Да, има дефектура на пет лекови во моментот. И немањето лекови е настанато делумно поради традиционални проблеми, делумно поради промени што се случуваат во од. Традиционалните проблеми – секогаш на преминот од една во друга финансиска година, се случуваат вакви проблеми. Тие досега се решавале со реверси, бидејќи реверсот како начин на работа е противзаконски, сите директори, вклучувајќи и на Клиниката за онкологија, имаат наредба, знаат дека не треба да примаат лекови на реверси. И во тој период од една во друга финансиска година и непримањето на реверси допринесе да настане овој проблем“, кажа денес Клековски, додавајќи дека проблемот не е финансиски, туку организациски.

Фондот лани одобрил пет милиони евра повеќе, а за оваа година ќе одобри значително поголеми средства. Според Клековски, проблем е дека тие во основа не знаат за колку пациенти, колку терапија е потребна.

„Колку пациенти имаме и колку терапија ни треба? И сето ова е ад-хок. И ова доведе до кривични пријави што, се надевам, ќе резултираат во некаква одговорност. Ние мораме да воспоставиме регистар на пациенти, како што веќе има за ретки болести, како што веќе има за дијабет, каде што соодветно ќе се евидентираат пациентите и планираат количините на лекови што се непходни и онаму каде што нема доволно лекови за сите ќе бидат јасни и транспарентни критериумите кои пациенти ќе ја добијат таа терапија кој пациент нема да ја добие соодветната или таква терапија како што се очекува.  Сакаме да воведеме регистри на пациенти на сите подрачја каде имаме значително употреба на посебно скапи лекови. Тоа е онкологија, хематологија, на педијатрија има такви регистри и на трансфузиологија планираме да се воведе таков регистар за болни од хемофилија. Тие се неколку клиники каде имаме посебно скапа терапија каде лекувањето на еден пациент може да чини десетици илјади евра годишно и мислам дека тоа мора да биде и јасно и транспарентно и одговорно“, рече директорот.

На новинарско прашање зошто се потребни шест месеци за да се избројат онколошките пациенти, тој рече дека не брои пациенти и оти има институции што се одговорни за тоа. Клековски вели  дека формирање регистер не е толку комплицирано, а посочи да се прашаат тие клиники што прават отпор, зошто го прават тоа.

„Ќе инсистирам да има регистер. Ние не можеме да продолжиме да финансираме нешто што е нејасно и нетранспарентно. Многу едноставно“, рече директорот на Фондот за здравство.