Основното јавно обвинителство Прилеп побара притвор за маж во Крушево обвинет дека 2 години ја демнел бившата сопруга. По спроведена претходна постапка, јавен обвинител од Основното јавно обвинителство Прилеп до Основниот суд во Крушево поднесе Обвинителен предлог за кривично дело Демнење од член 144-а став 2 во врска со став 1 од Кривичниот законик, соопштиОбвинителството.

„Во временскиот период од август 2023 до август 2025, обвинетиот повторено неовластено ја следел и прогонувал неговата поранешна сопруга, се мешал во нејзиниот личен живот и воспоставувал несакан контакт, движејќи се во просторот каде таа се наоѓала. Жената психички ја злоставувал, вознемирувал и застрашувал и со тоа предизвикал чувство на несигурност, вознемиреност и страв кај неа. Постојано телефонски ја контактирал и ја навредувал, повремено упатувајќи ѝ закани по живот. Се обидувал да влезе и во нејзиниот дом, а ја следел и се појавувал и на нејзиното работно место во Центарот за социјални работи“, вели Обвинителството.

Во текот на претходната постапка на обвинетиот му беа определени мерки на претпазливост кои не ги почитуваше, па надлежниот јавен обвинител заедно со обвинението поднесе и посебен предлог за определување мерка притвор.