Комисијата за утврдување дисциплинска одговорност на јавен обвинител во вршење на јавнообвинителската функција едногласно донела решение со кое се поведува дисциплинска постапка против Вишиот јавен обвинител на Вишото јавно обвинителство Скопје Мустафа Хајрулахи, за сторена тешка дисциплинска повреда согласно член 91 ст.1 алинеја 1 и 6 од Законот за јавното обвинителство.
Истовремено, Дисциплинската комисија исто така едногласно донела решение со кое се поведува дисциплинска постапка против Хајрулахи и јавниот обвинител во Вишото јавно обвинителство Скопје Јове Цветановски, за сторена тешка дисциплинска повреда согласно член 91 алинеја 6 од Законот за јавното обвинителство.
Постапувајќи по предлогот на Јавниот обвинител на Република Северна Македонија, Комисијата одржа расправа на која ги разгледа писмените извештаи од известителите по предлогот за поведување дисциплински постапки и писмените изјаснувања на јавните обвинители, по што оцени дека постои основано сомнение дека во двата случаи јавните обвинители сториле тешки дисциплински повреди.
Во првиот случај, дисциплинската постапка е поведена против Вишиот јавен обвинител на Вишото јавно обвинителство Скопје поради констатирани неправилности во начинот на заведување на предметите во Вишото јавно обвинителство Скопје.
„Втората дисциплинска постапка е поведена против јавен обвинител од Вишото јавно обвинителство Скопје поради нестручно и несовесно работење во 4 предмети во кои се откажал од жалба или обвинение, како и против Вишиот јавен обвинител на Вишото јавно обвинителство Скопје како негов шеф, пред кого била реферирана и со чија согласност била донесена одлука во три од наведените предмети“, вели Обвинителството.
Неофицијално, се работи за повлекување жалба или обвинение во предметите: Поштенска банка, предмет против Драган Павловиќ-Латас и за незаконскиот тендер за фирмата „Серта“ што ја чистеше Владата.
Бидејќи Хајрулахи е веќе оддалечен од функцијата поради кривична постапка која се води против него, Јавниот обвинител на Република Северна Македонија Љупчо Коцевски денеска донел одлука за оддалечување од функцијата сè додека трае постапката против него и на Цветановски, против кого е поведена дисциплинска постапка.
