Одреден е притвор за 37-годишен жител на Виница кој на 2 октомври претепал сограѓанин, кој во моментов е во кома и е во животна опасност. Притворениот тепач и тешкопредениот се кандидати за советници од листата на ВМРО-ДПМНЕ и коалицијата, ни потврдија извори од истрагата. По тешкото насилство, оваа листа до крајот останува минус двајца кандидати. Сега нема можност на нивно место да се пријават нови кандидати за советници.

Основното јавно обвинителство Кочани соопшти дека донесе Наредба за спроведување истражна постапка против едно лице од Виница за кривично дело Тешка телесна повреда од член 131 став 3 во врска со став 1 од Кривичниот законик.

Осомничениот 37-годишник, на 2 октомври, на паркинг простор пред ресторан во Виница, со умисла тешко телесно повредил едно лице и му го довел во опасност животот.

„Откако започнал вербална расправија со оштетениот во ресторанот, осомничениот пред објектот најпрво го фатил оштетениот за јакната и му задал повеќе удари со тупаници во стомакот. Потоа продолжиле да се туркаат и да се удираат со камења.Присутни лица се обиделе да ги раздвојат, но во еден момент осомничениот со камен го удрил оштетениот во задниот дел од главата и тој од ударот паднал во бесознание. Му била нанесена тешка телесна повреда – скршеница на черепот на главата, поради која оштетениот се наоѓа во кома и е неконтактибилен, а животот му е доведен во опасност“, велат од Обвинителството.

Јавниот обвинител, веднаш по настанот, доставил предлог до Судот со кој лицето беше обезбедено со мерка притвор во траење од два пати по 48 часа со цел да се обезбедат сите потребни докази особено во поглед на здравствената состојба на оштетениот. Во текот на денешниот ден, веднаш по формалното отворање на истрагата, надлежниот јавен обвинител до Судот достави предлог за определување редовен притвор во траење од 30 дена.