Одреден е притвор за три лица кои во четвртокот учествуваа во инцидентот со палење на македонското знаме на прославата на Денот на албанското знаме. Како што информираа од Министерството за внатрешни работи, од страна на Единицата за насилен криминал – Одделение за насилен криминал се преземени оперативни мерки и активности, како и прегледи на видеоснимки од безбедносни камери и видеа објавени на социјални мрежи, при што е обезбеден доказен материјал и документирани се дејствијата на лицата Ф. И., Е. Д. и С. М.

„Во координација со ОЈО Скопје, против нив е поднесена кривична пријава по брза постапка за кривично дело Предизвикување омраза, раздор или нетрпеливост врз национална, расна, верска и друга дискриминаторска основа по чл. 319 од КЗ и се изнесени пред судија за претходна постапка, кој им одреди мерка притвор во траење од осум дена“, велат од МВР.

На организираната прослава на Денот на албанското знаме на плоштадот Скендербег во Скопје, повеќе лица на неколку локации на булеварот Крсте Мисирков извршија палење и кинење на државното знаме на Македонија.