Татко и два сина се притворени на 8 дена, откако биле затекнати од полицајци со запалива течност, а очевидец претходно ги забележале како палат нискостеблеста шума и суви треви, соопшти Основното јавно обвинителство Скопје. Тие се осомничени за кривичното дело Предизвикување општа опасност, со тоа што предизвикале пожар кај Патишка Река, село на падините на Караџица.
„Тројцата соизвршители, со намера да предизвикаат општа опасност за животот и телото на луѓето или за имот од големи размери, на 9 август предизвикале пожар, полевајќи со запалива течност шумско земјиште покрај локален пат на местото викано Дупки, кај Патишка Река. Со запалка запалиле нискостеблеста шума и суви треви. Опожареното земјиште е во државна сопственост, а постоела опасност пожарот да се прошири на поголемо подрачје нискостеблеста и високостеблеста шума, па дури и да зафати дел од Националниот парк ‘Јасен’. Осомничените ги забележал и ги пријавил очевидец, а полициски службеници ги затекнале и кај нив пронашле повеќе литри од запаливата течност која ја користеле за предизвикување на пожарот. Противпожарни екипи интервенирале за да го изгасат пожарот“, се вели во соопштението.
Бидејќи делото се гони во скратена постапка, по предлог на јавниот обвинител, Основниот кривичен суд Скопје на тројцата осомничени им определи притвор во траење од по 8 дена.
