Американската влада денеска ги стави на црна листа софтверските компании Сајтрокс и Интелекса поради закана по националната безбедност на САД. Според соопштениете на американскиот Стејт Депертмент, станува збор за компаниите: Интелекса СА од Грција, Интелекса Лимитид од Ирска, Сајтрокс АД од Македонија и Сајтрокс Холдингс од Унгарија.
Овие компании се поврзуваат со софтверот за шпионирање „Предатор“, кој беше најден во телефоните на египетски политичар, египетски новинар и грчки политичар. Компанијата Сајтрокс, основана во Скопје во 2017 година, се смета дека го развила „Предатор“, со кој скришно може да се шпионираат Андроид и Иос телефони.
„Како дел од нашата посветеност да ги ставиме човековите права на прво место во американската надворешна политика, САД работи да спречи пролиферација и злоупотреба на дигитални алатки кои се користат за репресија. Овие чекори се насочени кон подобрување на дигиталната безбедност на граѓаните, борба против сајбер закани и осуетување на незаконското следење“, се вели во соопштението на американскиот Стејт Департмент.
Во сите четири компании како сопственици се јавуваат поранешни членови на израелското разузнавање.
