Минатата година недостасуваа 17 илјади ученици и студенти кои се иселени во последните 7 години, рече денеска министерката за образование и наука Весна Јаневска.
„Секако дека е огромна бројката, еве правиме сѐ што е можно за да ги задржиме. Она што е до областа на образованието. Секако дека и другите ресори прават сѐ што е потребно за да се обидеме на некој начин да барем во почетокот да ја намалиме оваа бројка, а потоа ако може и да ја стопираме.
Искрено се надеваме дека ако успееме да направиме сѐ што беше во предизборната програма, можеби дел од населението, ќе почне да се враќа во Македонија. Ако обезбедиме услови, а јас верувам дека и ќе обезбедиме. Подобрата економија е секогаш голем предизвик за луѓето што се наоѓаат во странство, без оглед колку е добро таму. Сите сакаат да бидат дома, доколку имаат услови за пристоен живот. Гледате економијата сега засега добро се движи и ако продолжи со ист правец верувам дека после краток број на години дел од нив ќе почнат да се враќаат“, рече министерката по прес-конференција на која зборуваше за набавка на нови учебници.
Лани во септември, Центарот за граѓански комуникации (ЦГК) објави анализа за намалување на бројот на ученици во основното и во средното образование. За една декада, бројот на ученици е помал за 27.000, според податоците на анализата на невладината организација.
Намалувањето е особено изразено во средните училишта. Намалувањето на средношколците е за 20 отсто. Намалувањето на основците е за 5 отсто.
Рекордот е Пехчево, град во кој речиси веќе и да нема средношколци, бидејќи таму има намалување за 83 отсто од пред десет години. Кај основните училишта најголемо намалување има во Ново село (за 57 проценти).
Б. НЕСТОРОСКА
