Амбасадорот на Велика Британија Метју Лосон за време денешната посета на Штип рече дека имал плоден разговор со градоначалникот на Штип во врска со обезбедување инвеститори од Британија за доизградба на Клиничката болница, а се надева дека ќе има британски инвеститори и во другите стопански области.

На 24 февруари, на тригодишнината од руската инвазија, Генералното собрание на ОН не ја одобри американската резолуција со која се бара крај на војната во Украина без да се спомене агресијата на Русија. Македонија, заедно со Унгарија, Грузија и Израел, бeше коспонзор на овaa резолуција на САД. Генералното собрание ја одобри ривалската украинска резолуција поддржана од Европа, со која се бара Русија веднаш да се повлече од Украина.

Во врска со ова, Лосон рече дека Украина секогаш била приоритет за Обединетото Кралство.

„Со македонската влада за некои меѓународни прашања можеби ќе имаме различно мислење, но како партнери во Нато имаме заеднички цели и заеднички ќе ги остваруваме истите, посебно оние кои се однесуваат за поголема сигурност и безбедност во регионот“ рече Лосон.

Вчера францускиот амбасадор во земјава, Кристоф Ле Риголер, рече дека одлуката за гласањето на Македонија за резолуциите за Украина беше неочекувана и нагласи дека целта на европската дипломатија е да се одржи унитарноста и да се има исти заеднички пристап кој ќе обезбеди безбедност на континентот во наредните години.

Британскиот амбасадор во Штип го посети и Универзитетот „Гоце Делчев“ каде што се разговарало за научно-образовната соработка и за поголема сајбер безбедност.

Т. ЈОВАНОВСКИ