Со слоганот „Омразата е слабост“, активисти од повеќе невладини организации денес маршираа низ центарот на Скопје, одбележувајќи го Меѓународниот ден на толеранцијата 16 Ноември. Маршот почна од Музеј на град Скопје, низ улица Македонија и заврши пред стоковна куќа „Мост“, каде организаторот на настанот Хелсиншкиот комитет за човекови права  ја промовираше годинешната кампања за толеранција.

„Традиционално секоја година го одбележуваме меѓународниот ден на толеранцијата, а годинава решивме да го споиме со 13 ноември, празникот на Скопје. Годинава акцент ставивме на говорот на омраза, кој изминативе години е особено забележлив на социјалните мрежи и особено ги погодува ранливите групи, како што се Ромите, ЛГБТ заедницата, потоа сите слободномислечки граѓани и сите оние што ја критикуваат власта. Мото на кампањата е ‘Омразата е слабост’, затоа одбравме љубов“, рече Уранија Пировска од Хелсиншкиот комитет.
Кочо Андоновски од Хелсиншкиот комитет потсети дека пред четири години на маршот на толеранцијата бече нападнта, како и останатите членови на ЛГБТ заедницата и дека за овој случај се уште нема судска разврска, а во меѓувреме застарело делото „смеќавање на јавен собир“.
„Сметаме дека за ова е одговорен Судот, бидејќи дозволи толку да се одолговлекува постапката и да застари едно од делата“, рече Андоновски.
Годинава по осми пат беше одбележан Меѓународниот ден натолеранцијата.