Актуелниот градоначалник на Општина Карпош и кандидат на коалицијата „Искуство за успех“, Стевчо Јакимовски, објави дека влегува во вториот круг од локалните избори, каде што ќе се соочи со кандидатот на ВМРО-ДПМНЕ, Сотир Лукровски.

Според првичните резултати, Јакимовски кажа дека неговиот противкандидат има минимална предност од 266 гласа, ситуација која тој ја оцени како „речиси пата-пата“.

„Јасно е изразена волјата на граѓаните. Гласовите на опозицијата се дупло повеќе во однос на ВМРО-ДПМНЕ. Очекувам во вториот круг поддршка од сите опозициски сили“, изјави Јакимовски на вечерашната прес-конференција.

Тој им се заблагодари на своите противкандидати Маја Мојсова од СДСМ, Антонио Димитров од Левица и на независната кандидатка Невена Ѓорѓиева за фер кампањата и изрази уверување дека граѓаните на Карпош ќе го изберат достоинството.

„Карпошани се на пат да си го одберат своето достоинство, да победат резултатите, проектите, знаењето и одговорноста“, додаде Јакимовски.

Вториот круг ќе се одржи на 2 ноември.